Ахмад ҳожи Хоразмий
Китоб жавонингизга
Аннакули Нурмаммедовнинг "Севги”си ҳақида мухтасар
Яқинда жаҳоннинг обрўли нашриётларидан бири бўлмиш Оксфорднинг "Silkway” (Ипак йўли) нашриётида таниқли ёзувчи, адабиёт соҳасида ҳалқаро Махтимқули мукофотининг соҳиби Аннакули Нурмаммедовнинг "Севги” номли шеърий китоби нашрдан чиқди. 
Туркман тилида ёзилган, салкам 500 бетлик "Soygi” номли бу шеърий китоб 8 та бўлимдан иборат бўлиб, унда муаллифнинг шеъриятга, адабиётга, ватанига ва ҳалқига бўлган севгиси ифодаланган десак, янглишмаган бўламиз.
"Пешонани тешган гул”, деб номланган 1-чи бўлимдаги шеърларни ўқисангиз, муаллифнинг адабиётга 13-15 ёшдан кириб келганига амин бўласиз. Биринчи бўлимдан еттинчи бўлимгача бўлган шеъларни ўқиш жараёнида, аввало муаллифнинг шеъриятда тўхтовсиз ижод қилаётганини кўрасиз. Қолаверса шеърларнинг савияси ва фалсафаси камолатга қараб ривожланиб бораётганини сезасиз.
Унинг ушбу китобидаги кўпгина шеърлари Туркман, Ўзбек, Турк, Азарбайжон хофизлари томонидан куйланаётгани, туркийзабон ҳалқларнинг бу қўшиқ(шеър)ларни севиб тинглашаётгани алохида таҳсинга лойиқдир.
Китобдаги охирги (8-чи) бўлим "Севги китоби ва шоирнинг яратувчанлиги ҳақида”, деб номланади ва бу бўлим буюк Чингиз Туркий (Айтматов)нинг оқ фатаҳоси билан бошланади. Бу бўлимда машҳур инглиз шоири Ричард Бренгартен, таниқли туркий олимлар; Доктор Салим Чоногли ва профессор Ахмад ҳожи Хоразмийларнинг бу китобга муносабатлари ҳам эълон қилинган.
Хулоса қилиб айтганда, Аннакули Нурмаммедовнинг "Севги”сини ўқисангиз, бу китобни ўқиш учун кетган вақтингизга афсусланмайсиз деб ва бу китобни бошқа тилларга ҳам таржима қилиш лозим, деган фикр билдирасиз, деб ишонамиз.
| 